職場上，不如事十常八九。一旦不滿度爆標，盛怒之下有打工仔囡會搵人發洩；有者會選擇報復式瘋狂搵工，唔理好醜，但求盡快「炒老闆」，風光地 resign。
此舉被網絡謔稱為 rage-applying，小弟姑且翻譯叫「復仇式浪射CV」。射得越多，快感越高（唔好諗邪野！）
浪射嘅結果，一係中，一係唔中（廢話）。
但停一停，諗一諗。
中咗：我真係恭喜你，你會投資大量時間去 interview，一旦浪射得手，更有機會由一個火坑跳去另一個，迎來 shift shock（轉職沖擊）。無間地獄歡迎你。
唔中：閣下炒老闆嘅夢想幻滅，死死地氣9am 準時番工，但暗中仍然密密默默搵工，周旋於希望與失望，同樣跌入無間地獄。
「不要在盛怒下做決定」，搵工亦如是。
浪射，說穿了只不過想搵個 quick-fix，報仇是唯一目的，結果損人不利己。與其陷入無間地獄，不如積極面對工作上嘅問題，再老套都要講：辦法總比困難多，諗唔掂可以搵 career coach 研究下。就算非走不可，都唔好浪射。
搵工係講策略，用左腦，唔係話多射幾球就係世一，情緒發洩唔到反而換來一世後悔。
搵工要有咩策略？篇幅所限，容小弟下次再講。